The Departed (2006)

Genre: Crime, Drama, Thriller
Download 2335

IMDb (8.5)….Rotten Tomatoes (90%)

 

ဒီနေ့တော့ ရုပ်ရှင် အဟောင်းလေး တစ်ကား အကြောင်း ပြောရအောင်။

တော်တော်များများတော့ ကြည့်ဖူးမယ်ထင်ရဲ့။

 

The Departed (2006) (IMDb Rating 8.5/10) ဆိုတဲ့ကားးပါ။

မူရင်းက ဟောင်ကောင်ရုပ်ရှင် ၂ ကားတွဲ Infernal Affair (2002) (IMDb Rating 8.1/10) ဆိုတာပါ။

ဒါကို ဟောလိဝုဒ်က တစ်ကားထဲဖြစ်အောင် သူတို့ နိုင်ငံနဲ့ ကိုက်ညီအောင် ညှိပြီး ရိုက်ယူထားတဲ့ ရုပ်ရှင်ဖြစ်ပါတယ်။

အရှေ့တိုင်း ဆန် တယ် လို့ ခံစားရတဲ့ ဟောလိဝုဒ် ကား တိုင်း ကြိုက်မိတာမို့ ကြည့်မိပါတယ်…

ပြီးတော့ ပါဝင်တဲ့ မင်းသား ၂ ယောက်လုံးအပြင် ဇာတ်ရံတွေကို နာမည်ကြီး မင်းသားကြီးတွေချည်း သုံးထားတာကလည်း ဒီရုပ်ရှင်ရဲ့ ဆွဲဆောင်မှု တစ်ခုပါ။

ကျနော် ပထမ တစ်ကြိမ် ကြည့်တုန်းက Leonado Dicaprio ထက် Matt Damon ကို ပိုကြိုက်တာမို့

Matt Damon ကို ဗီလိန် လုပ်ခိုင်းတယ်လို့ ခံစားရပြီး.. ပြီးအောင် ဆက်မကြည့်ဖြစ်။

နောက်ပြီး စကားပြောတဲ့ အခွန်းတိုင်းလိုလို “F” words က မလွတ်ဘဲ စကားလုံးတိုင်း ကြမ်းတာမို့ တော်ရုံသည်းခံနိုင်တဲ့သူတောင် စကားပြောခန်းတွေ  ဆက်မကြည့်ချင်။

ဟိုတလောကမှ လီယိုနာဒိုကို ပြန်တူးရင်း ကြည့်ရင်း သဘောကျလာတာမို့ ပြန်ကြည့်မယ် ဆိုပြီး ရွေးချယ် ကြည့်လိုက်မိတယ်။

သာမာန်အားဖြင့် ရုပ်လက္ခဏာအရ Matt Damon ကို အကောင်း

Dicaprio ကို အဆိုး ထားရမှာ ဖြစ်ပေမဲ့ ဒီ ရုပ်ရှင်မှာတော့ ပြောင်းပြန် ပြန်ထားတာမို့ ထူးဆန်းမှု တစ်ခုပါ။

ကြည့်ရင်းနဲ့ သူတို့ မူလ ရုပ်ပျောက်ပြီး Matt ကို အမြင်ကပ် ..Dicaprio ကို သနားလာအောင် သရုပ်ဆောင်နိုင်တာမို့ စီစဉ်သူရော သရုပ်ဆောင်တွေပါ မှော်အောင်တယ်လို့ ခံစားရပါတယ်။

ဇာတ်လမ်း သဘော အရ …

Jack Nicolson က ဒေသ တစ်ခု က Gangster ပါ။ ရပ်ကွက်ထဲက ဆိုးတဲ့ စရိုက်ရှိတဲ့ ကောင်လေးတွေ၊ သူ့ကို အထင်ကြီးတဲ့ ကောင်လေးတွေ၊ သူ့စကား နားထောင်မဲ့ ကလေးတွေကို ပေးကမ်းကျွေးမွေးထားတဲ့ သူတစ်ယောက်ပေါ့။

သူ့လက်တံရှည်တာမို့ ဒုစရိုက်မှုတိုင်း သက်သေမရှိပဲ သူ လွတ်နေလို့ ရဲတွေက အမှားစောင့်ကြည့်ရုံပဲ ကြည့်နိုင်တာပါ။

ဒီ ကြားထဲမှာမှ ရပ်ကွက်ထဲမှာ ဦးလေး နဲ့ နေတဲ့ ကလေးလေးကို ငယ်ကတည်း စည်းရုံး ကျောင်းထား၊ ကျောင်းပြီး တဲ့ အချိန်မှာ ရဲ တပ်ဖွဲ့ထဲကို ပို့ပါတယ်။ အဲဒီ ကောင်လေးက Matt Damon ပါ။

တချိန်တည်းမှာပဲ တခြားနေရာက မိသားစုမှာ ဒုစရိုက် နာမည်ပျက်တွေ ပြည့်နေတဲ့ ကောင်လေးတစ်ယောက်ကလည်း မိသားစု ကို စိတ်ကုန်ပြီး ရဲတပ်ဖွဲ့ထဲကို ဝင်ပါတယ်။ Dicaprio ပါ။

တပ်ဖွဲ့မတူပေမဲ့ ထူးချွန်တာ တူတာမို့ အထူးတပ်ဖွဲ့က အင်တာဗျူးပြီး ခေါ်တဲ့ အခါမှာ Gangster Jack Nicolson ရဲ့ မွေးစားသားက အမဲစက် Record မရှိဘဲ လူကြီးကြိုက်နဲ့ ရာထူး တစ်နေရာရသွားပါတယ်။

Dicaprio ကတော့ မိသားစု အမဲစက်နဲ့လူကြီး မျက်စိစူးပြီး Undercover ရဲ အနေနဲ့ပဲ နေရမယ်လို့ ကမ်းလှမ်းခံရပါတယ်။

Martin Sheen

Mark Wahlberg (နောက်ဆုံး Transformer ကားရဲ့ မင်းသား)

Alec Baldwin တို့က အထက်လူကြီးတွေပေါ့။

Undercover ရဲ Dicaprio ရဲ့ကိုယ်ရေးမှတ်တမ်းက Martin Sheen နဲ့ Mark Wahlberg တို့ပဲ သိထား ကိုင်ထားခွင့်ရှိတာဖြစ်ပါတယ်။

Matt Damon က သူ့မွေးစား အဖေ ကို စောင့်ကြည့်ဖမ်းဆီးရမဲ့ အထူးတပ်ဖွဲ့ထဲ ရာထူးတွေ တိုးတိုးလာချိန် တစ်ဖက်မှာလည်း Dicaprio က လူဆိုး ခေါင်းဆောင် Jack Nicolson နားမှာ နေရာ တစ်ခုရသူဖြစ်လာပါတယ်။

သူလျှို ၂ ယောက် ဟိုဘက် ဒီ ဘက် သီတင်း အပြန်အလှန် ပေးနိုင်မှုတွေ

ရဲတပ်ဖွဲ့နဲ့လူဆိုးဂိုဏ်းကြား ဉာဏ်ကစားမှုတွေကို တဖြေးဖြေးချင်းရိုက်ပြသွားတာပါ။

.

.

.

အဲဒီကားကိုကြည့်ပြီး ကြိုက်လွန်းလို့ မူရင်း ဟောင်ကောင် ကားတွေပါ ရှာကြည့်လိုက်တော့ အဲဒီကားကလည်း မင်းသား ၂ ယောက် အပြင် ဇာတ်ပို့တွေကိုပါ မင်းသားကြီးတွေ သုံးထားတာပါ။

ဟောင်ကောင် ကားကတော့ ဇာတ်ရုပ် လိုက်ဖက်တယ်လို့ ခံစားရပါတယ်။

Andy Lau ကရဲ သူလျှို နေရာက ဖြစ်ပြီး

Tony Leung ကတော့ လူဆိုးဘက်ရောက် Undercover ရဲ အဖြစ်

ဒါ့အပြင် Anthony Chau-Sang Wong နဲ့ Eric Tsang စ တဲ့ မင်းသားကြီးတွေပါ ပါ လို့ ကားကောင်း တစ်ကား ဖြစ်မယ် ဆိုတာ ငြင်းမရပါဘူး။

ဟောင်ကောင်ကားကို ၂ ကားလုံး ကြည့်မယ် ဆိုရင် ၂ က စကြည့်ပြီးမှ ၁ ကို ကြည့်ပါလို့။

၂ က ငယ်ဘဝတွေကို ရိုက်ထားတာမို့  Edison Chen   နဲ့ Shawn Yue   စတဲ့ မင်းသား အငယ် ၂ ယောက်ကို သုံးထားပါတယ်။

တစ်ကားပဲ ကြည့်မယ် ဆိုရင်တော့ ၁ ကို ပဲ ကြည့်ပါ။ ၁ ဇာတ်သိမ်း ကြည့်ပြီးရင် ၂ က ကြည့်လည်း မထူးတော့ဘူး ခံစားရပါတယ်။

ဒီကားတွေ ကြည့်ပြီး ကျနော် ခံစားမိတာကတော့ ကျနော်တို့ကို အန္တရာယ်ကနေ ကာကွယ်နေတယ်လို့…ထင်ရ …ယုံကြည်ရ…

အသံကောင်းဟစ်နေတဲ့ လက်နက်ကိုင် အဖွဲ့အစည်းတွေထဲမှာရော ဘယ်လောက် ပရော်ဖစ်ရှင်နယ်ဆန်တဲ့ စိတ်ဓာတ်မျိုးတွေ ရှိမလဲ၊ ဘယ်လို စိတ်ဓာတ် ပုပ်ပွမှုတွေရှိမလဲ ကျနော်တို့ ဘယ်လောက် အထိ သိနိုင်မလဲ မသိ။

Please, wait..
Channel Mandalay APK ကို downloadရန်နှိပ် ပါ။